Tók að mér nýjan fugl í gær. Þetta er dísukarl sem fannst í Hafnarfirði og þrátt fyrir að hafa verið auglýstur hefur engin gefið sig fram sem eiganda.
Fuglinn er þrælspakur og rólegur og fínasta viðbót við ástargaukana tvo sem voru fyrir á heimilinu.
Hmm...
Honum var fundið heimili í búrinu hennar Skottu, hringhálsans sem týndist rétt fyrir gamlárs, hann kann vel við sig í búrinu en kýs þó helst að leggja sig á tánum eða ristinni á manni og hefur því fengið nafnið Lappi.
Ástargaukurinn Þyrla er alger flóttasnillingur, hún finnur sér leið út úr búrinu ef einhver glufa er og eiðir miklum tíma í að leysa þær þrautir sem eiga að koma í veg fyrir flótta.
Um daginn komst hún út en ekki inn aftur og var ein úti í heilan dag, þegar hungrið fór að segja til sín tróð hún sér inn í lokað búrið hjá dísarfuglinum Lappa.
Lappi lét sér fátt um finnast sem er undarlegt þar sem fuglar verja oft sitt heimili af hörku. Þau voru samt engir vinir og hvæstu aðeins hvort á annað.
